Gwybodaeth Digwyddiad

28 Mawrth 2025 – 8yh

Tocynnau £12

Gyda’i gyrfa canu a recordio yn ymestyn yn ôl dros ugain mlynedd mae Meinir Gwilym wedi perfformio ar brif lwyfannau Cymru i gyd, ac yn dychwelyd i Gray’s Inn Road am y tro cyntaf ers 15 mlynedd. Mae ei chaneuon gwreiddiol gonest ac apelgar wedi hen ennill eu plwyf a’i pherfformiadau byw niferus yn adnewyddu’r enaid ac yn cyffwrdd y galon.

Mae ei halbym ddiweddaraf ‘Caneuon Tyn yr Hendy’ yn cynnwys 8 cân newydd sbon a thrac bonws, sef ei sengl ddiweddaraf, ‘Goriad’. Yn gasgliad amrywiol o ganeuon, mae dawn Meinir fel bardd a cherddor unwaith eto yn serennu.

“Dydw i erioed wedi recordio albym mewn cyn lleied o amser,” meddai Meinir, “tair wythnos ella o’r dechrau i’r diwedd. Mae o’n gasgliad sy’n mynd i bob man o ran arddullia cerddorol. Dwi heb guradu’r caneuon mewn unrhyw ffordd, nac ymdrechu i’w caethiwo nhw mewn bocs o ‘genre’. Ma nhw wedi cael ymddangos a thyfu sut bynnag oedd yn siwtio. Ma’ nhw’n mynd o faledi i bop nostalgic 90au, i sgrech o gân fatha ‘Chwarter i Hanner’. Gawn ni weld sut ymateb geith yr albym. Ond dwi’n diolch am y fraint o gael ei ysgrifennu.”

O ddidwylledd amrwd y gân ‘Dwi’m yn Cofio’ i her ac ysbryd dyrchafol cân agoriadol yr albym, ‘Waliau’, mae Caneuon Tyn yr Hendy yn mynd â’r gwrandawr ar daith ar hyd llwybrau antur, hiraeth, serch, ansicrwydd a gobaith.